Náttúrufræðikennrarnir Margrét Hugadóttir og Dögg Lára Sigurgeirsdóttir taka á móti okkur í Langholtsskóla og kynna námsefnið Vísindavöku. Námsefnið samanstendur af kennslumyndböndum, kennsluleiðbeiningum og tillögum að námsmati.
Markmið Vísindavöku eru að nemendur verði færir til að tjá sig um vísindalegt ferli og geti beitt orðinu „breyta“. Verkefnið er ætlað nemendum í 6.-10. bekk og getur verið endurtekið árlega. Halda áfram að lesa
Opnuð hefur verið vefsíðan http://visindavaka.natturutorg.is/.
Vísindavaka er áhugavekjandi verkefni ætlað nemendum á miðstigi og unglingastigi. Markmið námsefnisins eru að nemendur þjálfist í að vinna eftir ferli vísinda, geti beitt hugtakinu „breyta“ og að nemendur geti útskýrt athugun á vísindalegan hátt.
Í verkefninu sem tekur um 8-10 40 mínútna kennslustundir hanna nemendur eigin samanburðartilraun, fylgja ferli vísinda og bjóða yngri nemendum á vísindasýningu, hina eiginlegu Vísindavöku þar sem þeir kynna verkefni sín og sýna listir sínar.
Náttúrufræðikennarar eru hvattir til að nota efnið og er öllum frjálst að nota og aðlaga námsefnið að sínum þörfum.
Á síðunni eru þrjár kennslumyndir sem eru 3-6 mínútur á lengd en þær eru Ferli vísinda, Breyta og Hvað er Vísindavaka. Að auki má finna ítarlegar kennsluleiðbeiningar fyrir kennara með tillögum að námsmati og námsleiðbeiningar fyrir nemendur.
Að verkefninu standa Margrét Hugadóttir og Ingibjörg Hauksdóttir náttúrufræðikennarar. Dögg Lára Sigurgeirsdóttir, náttúrufræðikennari sá um upptökur og klippingu, Krista Hall, grafískur hönnuður myndskreytti og Ævar Þór Benediktsson og Urður Heimisdóttir sáu um leik. Útgáfa verkefnisins var styrkt af Þróunarsjóði námsgagna og er hýst hjá Náttúrutorgi
Á Menntavísindasviði Háskóla Íslands verður á næstu misserum boðið upp á nýtt og spennandi nám fyrir starfandi grunnskólakennara. Um er að ræða diplómanám (15-30e) sem dreifist á 3 misseri og nýtist til meistaragráðu fyrir þá sem vilja. Áhersla er á samvinnu kennara í náminu og kennara á sviðinu að því að efla nám nemenda í náttúrugreinum.
Við skipulag námsins var unnið út frá upplýsingum sem komu fram í svörum við spurningalista sem sendur var í fyrra til kennara sem kenna náttúrugreinar. Námið er útskýrt nánar í meðfylgjandi kynningarblaði.
Með bestu kveðjum og von um að sjá þig í haust
Kristín Norðdahl umsjónarmaður námsins
Orkubox er B.Ed verkefni Brynju Stefánsdóttur, það er safn af 15 verk
legum æfingum tengdum orku. Höfundur segir:
Þetta hefti inniheldur verkefni og athuganir til að nota samhliða kennslu um orku. Verkefnin voru búin til með unglingastig í huga og miða að því að nemandinn sé í aðalhlutverki. Þau eru sett upp þannig að nemandi ætti að geta útskýrt hugtök tengt athugun og ástæður þess sem er að gerast hverju sinni, að yfirferð lokinni.
Kennarar ættu að gera nýtt sér þetta safn sem finna má á Skemmu http://hdl.handle.net/1946/18921 þar er bæði kennarahefti og nemendablöð sem eru ítarleg og skemmtilega myndskreytt af Anitu Berglindi Einarsdóttur.
Nemendur á námskeiðinu Kennslufræði lífvísinda við Menntavísindasvið HÍ heimsóttu Grasagarð Reykjavíkur og áttu ánægjulega og fróðlega stund. Björk Þorleifsdóttir fræðslufulltrúi tók á móti okkur og talaði um garðinn, starfsemina þar og sýndi okkur verkefni sem útbúin hafa verið og kennarar geta fengið lánuð í heimsóknum eða fengið leiðsögn fræðslufulltrúa. Garðurinn er stór og margt sem hægt er að skoða og notfæra sér til kennslu. Vefsíða Grasagarðs Reykjavíkur gefur líka mikið af upplýsingum. Grasagarðurinn stendur fyrir fjölbreyttri fræðslu fyrir almenning árið um kring og vert er að fylgjast með síðu þeirra á Facebook til að missa ekki af áhugaverðum viðburðum.
Tekið er á móti skóla-, vinnustaða- og félagahópum allan ársins hring eftir samkomulagi. Bókanir og nánari upplýsingar hjá Hildi í síma 411-8650 virka daga kl. 9-15 eða á botgard@reykjavik.is
Myndir úr heimsókninni:
Nýlega hlaut NaNO styrk að upphæð 3.000.000 kr. úr Rannsóknarsjóði síldarútvegsins fyrir verkefnið NaNO námsefni – Náttúra, nýsköpun og tækni í sjávarútvegi. Meginmarkmið sjóðsins er að efla vöruþróun og markaðsöflun á síldarafurðum. Jafnframt að efla nýsköpun, rannsóknir og fræðslu- og kynningarstarf í sjávarútvegi. Styrkurinn verður nýttur til að semja, prófa og birta á vef námsefni um sjávarútveg sem veki áhuga nemenda með því að fást við nútímaleg viðfangsefni tengd samspili atvinnulífs, vísinda, tækni, náttúru og samfélags. Námsefninu er ætlað að nýtast ólíkum námsgreinum, stuðla að samþættingu þeirra og vinna þvert á greinar, bóklegar og verklegar. Námsefnið er unnið í samvinnu við Hafrannsóknastofnun og Matís.
Frá styrkafhendingu, á myndinni eru frá vinstri: Jens Garðar Helgason, formaður Samtaka fyrirtækja í sjávarútvegi, J. Snæfríður Einarsdóttir, HB Granda, Ester Ýr Jónsdóttir, verkefnisstjóri NaNO hjá MVS HÍ, Árni Gunnarsson, Skotta film og Sigurgeir Brynjar Kristgeirsson.
NaNO er verkefni á vegum Menntavísindasviðs Háskóla Íslands og hófst það í september 2013. Markmið NaNO er að efla náttúrufræðimenntun í leik-, grunn- og framhaldsskólum og hafa verkefnisstjórar m.a. unnið að því markmiði með gerð námsefnis fyrir þessi skólastig auk þess að halda námskeið fyrir starfandi kennara og kennaranema, menntabúðir og málþing um náttúrufræðimenntun. Verkefnisstjóri er Ester Ýr Jónsdóttir.
Vel heppnaðar menntabúðir voru haldnar í dag þar sem Haukur Arason bauð uppá hraðferð í gegnum alveg urmul af verklegum æfingum tengdum rafmagni og seglum. Tuttugu kennarar mættu, lærðu, rifjuðu upp og deildu eigin reynslu.
Eins og oft áður bárust kaup á aðföngum í tal og þær uppástungur sem bárust voru um Miðbæjarradíó sem selur ýmiskonar rafmagnsvörur og nýjustu meðmæli segja að gott sé að panta áhöld á Aliexpress. Þessir tenglar eru líka komnir í safnið af söluaðilum búnaðar sem við höfum safnað saman.
Skoðaðar voru tilraunir og sem og dót sem hentar eldri og yngri nemendum, YouTube-myndbönd og sýndartilraunir á Phet, en mikið úrval er til af þeim um rafmagn og segulmagn.
Í lokin var kíkt á stafrænan mæli frá Pasco, sem A4 selur og er á vel viðráðanlegu verði, en hugbúnaður fyrir snjalltæki sem fylgir þeim er fríkeypis og nálagst má á vefsíðu þeirra, tengla yfir í Play Store og App Store. Einnig var bent á sambærileg tæki frá Vernier, en ekki var vitað hver er umboðsaðili með því vörumerki.
Bestu þakkir kennarar fyrir komuna og Haukur fyrir þitt framlag.
Haukur Arason, dósent við Menntavísindasvið Háskóla Íslands tekur á móti okkur í stofu K202 í húsnæði Menntavísindasviðs Háskóla Íslands við Stakkahlíð.
Menntabúðirnar fjalla að þessu sinni um eðlisfræðitilraunir, verklegar athuganir um rafmagn og segulmagn fyrir nemendur á yngsta stigi, miðstigi og unglingastigi grunnskóla.
Í dag er málstofa þar sem fjallað verður um börn og notkun stafrænna miðla sjá nánar á http://menntavisindastofnun.hi.is/born_og_notkun_stafraenna_midla_heima_og_i_nyskopunarsmidjum_eda_gerverum_e_makerspaces
Sem þátttakandi í þessu verkefni hef ég verið að lesa um maker spaces sem ég ætla að sinni að kalla gerver. Ekki þarf að lesa lengi til að sjá miklar tengingar við raungreinar ýmiskonar. Á BETT í janúar mátti t.d. sjá mikla kynningu frá Microsoft á gerverum og þeir tala um Hacking STEM, en gerver eru einnig kölluð Hacker spaces og STEM stendur fyrir Science, technology, engineering and math (náttúruvísindi, tækni, verkfræði og stærðfræði).
Eitt af verkefnum sem nálgast má á vef Microsoft https://www.microsoft.com/en-us/education/education-workshop/january.aspx
Málþing um náttúrufræðimenntun var haldið 31. mars og 1. apríl í Stakkahlíð. Þingið sóttu vel yfir 100 manns, áhugafólk um náttúrfræðimenntun af öllum skólastigum. Þessi þing eru mikilvægur vettvangur fyrir þennan hóp að hittast, ræða málin og læra hvert af öðru. Við getum strax farið að hlakka til 2019 en þá er áætlunin að halda þingið á Akureyri.
Hér fyrir neðan má finna tíst, frá málþinginu. og myndir á Flickr
/sp